Teams.

Kvar dag er same greia.
Stå opp og gå inn på teams. Sjå læraren prate, late som ein er engasjert og gjere oppgåver. Sidan skulen stengde, har eg sett klassen og venane mine gjennom ein skjerm.
Drit kjedeleg!

Frå mars 2020 til våren 2022 snudde koronaviruset om kvardagen til ungdomane våre. Dei fekk mellom anna beskjed om å isolere seg heime og utføre skule- og fritidsundervisning gjennom kommunikasjonsplattformen Microsoft Teams. I denne devised-baserte produksjonen, har gruppe 4 på teaterskulen i Førde reflektert/notert og bearbeida sine tankar om denne perioden i livet sitt.

Kvifor må vi sitte bak ein liten skjerm og snakke? Det er følsomt, vondt, usosialt og trist. Eg vil klemme, ikkje ringe. Eg vil stå fjes mot fjes og ikkje skjerm mot skjerm!

Ja, me skal ikkje verta smitta, men det er meir kos å vera smitta saman enn å vera frisk åleine.

Førestillinga «Teams» er eit resultat av så langt me kom i ein prosess på 5 månadar med utforsking. I ettertanke etter to år med landeplagen covid-19, skildrar stykket mellom anna fritidsinteresser som ungdomane ikkje fekk vera med på, vener dei ikkje fekk møtt og eit perspektiv på dataverda sin verknad på kvardagen. Framsyninga er utarbeida gjennom improvisasjon av eit tekstleg- og fysisk materiale.

Gruppe 4 på teaterskulen i Førde består av 13 ungdomar i alderen 11-17 år frå heile Sunnfjord kommune. I løpet av knappe fem månadar våren 2022, har dei jobba hardt som forfattarar og skodespelarar i dette devised-produserte stykket. Samstundes har dei som dei fleste andre denne våren måtte stå i koronaviruset sine sjukdoms-utfordringar. All ære til dei flotte skodespelarane våre!

• Speledato: Sundag, 29. mai klokka 17.00 og 19.00
• Spelestad: Teatersalen i Førdehuset
• Varighet: ca. 30 min
• Billettar: Førdehuset

Gå til arrangementet på facebook